Con algo de atraso fixemos esta mañá entrega do premio á gañadora do Certame de relatos de medo que este ano organizamos dende a biblioteca do centro.
A gañadora foi Noa Tobio de 1º A, baixo o pseudónimo Sakura, cun relato titulado O camiño das faíscas.
Parabéns á gañadora e a todos os participantes por colaborar neste certame.
Hoxe visitou a Biblioteca alguén moi especial e quixo contarnos a súa historia.
Estamos achegándonos ao Nadal e por estas datas baixa das montañas de Lugo o Apalpador, que trae regalos a todos os nenos e que antigamente lles levaba castañas.
A ver se este ano hai sorte e de portármonos todos ben visítanos o noso carboeiro máis querido, que vén dos Ancares e do Courel traéndonos moitas sorpresas.
Tamén sumouse á festa contadora destes días a nosa compañeira Marta Varela que estivo a ler e contar diferentes contos co nadal como pano de fondo. Así que acondicionamos un recuncho do noso colexío e sentados arredor da cheminea non perdemos detalle de canto alí Marta nos falou.
Samaín é un tempo de fantasía, de misterio, de defuntos e recollemento. A tradición galega é rica en historias que foron pasando de xeración en xeración e nós sempre tivemos gusto por escoitalas.
A nosa tradición está chea de meigas, de aparecidos, de lobishomes e de contos que non teñen moita explicación.
Polo Samaín botamos man de historias misteriosas e de suspense e fixemos de contacontos, seguindo o noso labor de transmisores e así o alumnado de secundaria leu aos seus compañeiros das etapas inferiores dende infantil a terceiro curso de primaria, actuando como contadores de historias.
Así, desfilaron pola biblioteca o Carabuñas, O home do saco ou A pantasma das bragas rotas que foron a ledicia de todos e de todas.
A través dos libros accedemos a novos mundos, coñecemos persoas, historias marabillosas, vivimos experiencias e vidas en lugares insólitos. Tal vez por iso regresamos as súas páxinas unha e outra vez e son centos as mans que acariñan as súas follas. Co uso moitos deles acaban deteriorándose e estráganse.
A idea de facer este obradoiro é para concienciarnos da importancia do coidado dos libros e así alongar a súa vida útil. Recuperalos para que sigan a alimentar a imaxinación dos lectores.
Marga García, do obradoiro de encadernación Tarlatana acompañounos e guiou a un grupo de alumnas na tarefa de restaurar e reparar algúns libros que estaban na biblioteca agardando por algún coidado.
Ensinounos como se pode arranxar unha folla solta, a tapa, os lombos, os cantos ou as gardas. Aprendemos a recoñecer os materiais que se empregan na encadernación e o máis importante, a ter paciencia e a valorar a importancia de coidar algo que nos fai tan felices como son OS LIBROS.
Hoxe, 8 de abril, levaronse a cabo unhas charlas informativas sobre Educación Vial en colaboración coa policía local, dirixida ao alumnado do último ciclo de Primaria e os primeiros cursos de Secundaria.
O martes 1 de abril, organizouse na biblioteca, un obradoiro de xogos tradicionais no que participou o alumnado de Infantil, 1º, 2º e 3º de Primaria.
Este luns 31 de marzo, levouse a cabo na biblioteca do centro, unha actividade teatral en colaboración coa ANPA para o alumnado de 1º, 2º e 3º da ESO
O 28 de marzo organizouse unha charla informativa para concienciar ao alumnado do primeiro ciclo de Secundaria do potencial perigo que transmiten os videoxogos basados na violencia.
Para festexar o Día de Rosalía, alumnado de Primaria e de Secundaria, leron uns poemas da escritora. Despois todo ao alumnado do CPI do Toural mailo profesorado foron convidados a tomar un caldo.
